སྨན་གྱི་སྤུས་ཚད་ལ་དོ་སྣང་བྱེད་དགོས།

  མཁས་དབང་ཁྲོ་རུ་ཚེ་རྣམ་ལགས་ནས།

   དེ་ལྟར་བོད་ཁམས་ཀྱི་ས་གཞི་ཆེན་པོ་འདི་ནི་སྨན་རིགས་སྣེ་མང་འཛོམས་པའི་སྨན་གྱི་བང་མཛོད་ཆེན་པོ་ཞིག་ཡིན་ནའང་སྨན་འཚོལ་སྒྲུབ་དང་། བདག་གཉེར། ལས་སྣོན་སྦྱོར་བ། བེད་སྤྱོད་བྱེད་སྟངས་བཅས་མི་འདྲ་བ་ལ་བརྟེན་ནས་སྨན་གྱི་ནུས་པ་ལེགས་ཉེས་ཀྱི་ཁྱད་པར་ཡོང་གི་ཡོད་པ་རེད། སྨན་གྱི་སྤུས་ཚད་ལེགས་ཉེས་ཟེར་བ་ནི། སྨན་གང་ཞིག་སྨན་རང་རང་གི་ངོ་བོ་ངོས་འཛིན་མ་ནོར་བའི་སྟེང་དུ་འཐུ་སྒྲུབ་དང་། བདག་གཉེར། ལས་སྣོན། སྦྱོར་བ་བཅས་ཚུལ་བཞིན་དུ་བྱས་ནས་སྨན་རང་རང་ལ་ཡོད་པའི་ནུས་པ་དེ་ཇི་མ་ཇི་བཞིན་སྲུང་ཉར་བྱེད་ཐུབ་པ་ལ་སྨན་གྱི་སྤུས་ཚད་ལེགས་པ་ཞེས་ཟེར་བ་དང་། དེ་ལས་ལྡོག་པ་ནི་སྨན་གྱི་སྤུས་ཚད་ཞན་པ་ཡིན། སྤུས་ཚད་ཞན་པའི་སྨན་གྱིས་ནི་གཞུང་ལས་ཇི་སྐད་གསུངས་པའི་ནུས་པ་ཇི་བཞིན་ཐོན་མི་ཐུབ། དཔེར་ན་སྨན་རྫས་ལ་བཤད་ན། བཏུས་ནས་ལོ3ཡན་ཆད་ལོན་པའི་པྲི་ཡངྐུ་དང་། གཡའ་ཀྱི་མ་ལྟ་བུ་སྔོ་སྨན་ལོ་མའི་རིགས་དང་། ལུག་རུ་སེར་པོ་ལྟ་བུ་སྔོ་སྨན་མེ་ཏོག་གི་རིགས་ལྟ་བུ་ཡིན། སྔོ་སྨན་གྱི་རིགས་མཐའ་དག་དེས་མཚོན་འཚོལ་སྒྲུབ་བདག་གཉེར་ལེགས་པར་བྱས་ཏེ་སྨན་གྱི་སྤུས་ཚད་ཡག་པོ་ཡོང་བ་བྱ་རྒྱུ་ནི་ཤིན་ཏུ་གལ་ཆེ།