བོད་ཡིག
མཁས་དབང་ཁྲོ་རུ་ཚེ་རྣམ་ལགས་ནས།
སྤྱིར་སྨན་ནི་འགྲོ་བ་མིའི་རིགས་ཀྱི་ནད་གསོ་ཞིང་ལུས་ལ་ཕན་པར་བྱེད་པའི་ནུས་པ་ཁྱད་པར་ཅན་ཞིག་ལ་ཟེར་བ་ཡིན། རྒྱལ་ཁབ་ཁག་དང་། མི་རིགས་ཁག ཡུལ་ཁམས་མི་འདྲ་བ་སོ་སོར་སྨན་གྱི་རྣམ་གྲངས་དང་ངོས་འཛིན་མི་འདྲ་བ་མཐའ་ཡས་པ་ཞིག་ཡོད་མོད། ང་ཚོ་བོད་ཀྱི་སྨན་གཞུང་ནང་དུ་གཏན་ལ་ཕབ་པ་ལྟར་ན་རིན་པོ་ཆེའི་སྨན་དང་། སའི་སྨན། རྡོ་སྨན། ཤིང་སྨན། རྩི་སྨན། ཐང་སྨན། སྔོ་སྨན། སྲོག་ཆགས་ཀྱི་སྨན་བཅས་སྡེ་ཚན8དུ་དབྱེ་བ་ཕྱེས་ནས་སྨན་དེ་དག་གི་རོ་དང་། ནུས་པ། བསིལ་དྲོད། ཕན་གནོད་བཅས་གསལ་བཤད་བྱས་ཡོད། རྣམ་པ་བརྒྱད་པོ་དེ་ཡང་རིགས་བསྡུ་ན། རིན་པོ་ཆེའི་སྨན་དང་ས་རྡོའི་སྨན་ཕལ་ཆེར་ནི་གཏེར་ཁ་ལས་བྱུང་བའི་སྨན་གྱི་རིགས་ཡིན་པ་དང་། སྲོག་ཆགས་ཀྱི་སྨན་ནི་སྲོག་ཆགས་ལས་བྱུང་བའི་སྨན་དང་། དེ་བྱིངས་ཚང་མ་སྐྱེ་དངོས་རྩི་ཤིང་གི་རིགས་ཡིན་པས། སྤྱིར་རིགས་རྣམ་པ་གསུམ་དུ་གྲངས་ངེས་པ་དེ་ལྟར་ཡིན། རིགས་གསུམ་གྱིས་བསྡུས་པའི་སྨན་རྫས་དེ་དག་གི་ནང་ནས་གླང་ཆེན་གྷི་ཝཾ་དང་། ཁ་ཆེ་གུར་གུམ། བསེ་རུ་སོགས་སྤུས་ཚད་ལེགས་པའི་སྨན་རྫས་ཁག་གཅིག་ཕྱི་ཕྱོགས་ནས་འཚོལ་སྒྲུབ་བྱེད་དགོས་པ་ཕུད། དེ་བྱིངས་སྨན་རྫས་ཕལ་ཆེར་བོད་ཡུལ་སྟོད་སྨད་རང་ནས་ཐོན་གྱི་ཡོད། དེས་ན་འཛམ་གླིང་གི་རྩེ་མཐོ། ཁོར་ཡུག་གངས་རིས་བསྐོར་བའི་སྨན་ལྗོངས་གཙང་ཞིང་ཉམས་དགའ་བ། གངས་ཅན་བོད་ཀྱི་ཡུལ་ཁམས་ནི་སྨན་རིགས་ཀྱི་འབྱུང་ཁུངས་བླ་ན་མེད་པ་ཕུན་སུམ་ཚོགས་པ་ཞིག་ཡིན་སྟབས་སྨན་རིགས་སྣེ་མང་འཛོམས་པ་སྤྱད་ན་འཛད་མཐའ་མེད་པ་ཞིག་ཡོད་པ་འདི་ནི། ང་ཚོ་བོད་མི་རིགས་ཡོངས་ཀྱི་ནང་ནོར་རྩ་འགངས་ཆེ་ཤོས་ཤིག་ཡིན་པར་བརྟེན་གཏེར་རི་དང་། སྐྱེ་དངོས། སྲོག་ཆགས་བཅས་ལས་བསྡུས་པའི་སྨན་རིགས་ཀྱི་འབྱུང་ཁུངས་མཐའ་དག་ནམ་ཡང་སྲུང་ཉར་འཐུས་ལེགས་དང་། བེད་སྤྱོད་ཚུལ་མཐུན་བྱས་ནས་དེ་དག་གི་འབྱུང་ཁུངས་རྩ་སྟོངས་སུ་མི་འགྲོ་བའི་ཐབས་ལ་འབད་འབུངས་གནང་རྒྱུ་ནི་ཤིན་ཏུ་གལ་ཆེ་བར་འདུག་སྙམ།